ايها المضربون عن الطعام .. افيقوا

أنا اسمع عن واحد يطالب بحقه ..
 واحد يخاف على نفسه و عياله و مايطالبيش بحقه ..
واحد و هو بيطالب بحقه يدوس على حق حد و هو مش واخد باله ..
انما واحد يطلب حقه بانه يهين نفسه !! دي غريبه 


سيدي المضرب عن الطعام .. انت فاكر هيحصل ايه ؟ 


انت في بلد بيموت منها جنود على الحدود و محدش بيتحرك 
انت في بلد ضحت بفوق الالف شهيد و كل مسؤول بينكر
انت في بلد العباره و الدويقه 
انت في بلد طوابير العيش و الزراعة بمية الصرف


سيدي المضرب عن الطعام .. انت فاكر حد هيتعاطف معاك من الحكومه ؟


احنا بس اللي هنتعاطف معاك و انت بتعذب في نفسك
 و اعذرني لو قلت .. بدون داع 


بتموت نفسك ليه ؟ انت شايف الثورجيه كتير يعني عايز تقللهم واحد ؟ 
شايف الناس كلها عندها وعي سياسي بحقوقهم فحسيت انك زياده مثلا فقلت تموت نفسك ؟
شايف مصر خلاص بقت بخير و اللي حاميها مبقوش حراميها ؟




سيدي المضرب عن الطعام .. احنا محتاجين ارادتك و قوتك و اصرارك و تصميمك و صبرك في بناء مصر الحريه


سيدي المضرب عن الطعام .. محتاجيك بصحتك تهتف و تصرخ في وش الظلم مش تنام قدامه تعبان !


سيدي المضرب عن الطعام .. محتاجين علمك و وعيك بحقوقك تنشره بين الناس 


سيدي المضرب عن الطعام .. ارجوك .. قوم شوف حاجه تاكلها و متجيش على نفسك اكتر من كده .. و ابدأ يللا واجه الظلـــــم بقوتك مش بضعفك

قوينا و استقوى بينا .. الشغل لسه كتير متستعجلش على رزقك ..

الشبشب ...... و عجبي

الراجل يا عيني كان ماشي في حاله ...... و فجأه ...... مفضلش منه غير شبشب ...

و هو اللودر من امتى و هو بيشيل بني ادمين ؟؟

عجبي عليك يا زمن فيك الشبشب غرقان لشوشته ... بينداس عليه بـ 100 صرمه و 

الف عجلة و كاوتش , و اهو راضي و ساكت ,, مستني صاحبه اللي مش داري بروحه 

... و لا  عارف ان كانت فيه و لا راحت لما راحالشبشب ...

و ااااااااااخ من الشبشب لما يبقى قاعد بلا لازمه .....

لا حماني من حاجه و لا حتى شفى غليلي 

هو انت يعني عمرك ما فكرت تساعدني باكتر من ركنتك تحت رجلي ؟؟ عمرك ماشفت 


نفسك غير بدوس على صرصار و بتفعص يا عيني في نمله ؟

يا سيدي ان كان على الصراصير فهما اشكال و الوان منهم اللي بشنبات و اللي من غير


 شنبات , و منهم اللي محسوب علينا بشنبات ... و دول يا سيد الكل اول من لازم ينداس 

قوم اتلحلح .... هتفضل مرسوملي على لوحه؟ و لا مرميلي في حبة طين متهان ؟؟


 فووووق ده انت اللي بتدوس ... مش انت اللي تنداس

فوق ده انا كنت هعيط جنبك لجل ما تتكلم لكنك حمار مش فاهم

فوق بقي تعبت قلبي

فوق ده الذل وحش