التدوينة دي عن (مصطفى حسني) على فكرة، كمل للآخر بس =))

مش هابرر اسم التدوينة العجيب ده! لاني مش لاقيه مبرر مناسب :)) 

ندخل في الموضوع على طول!

احنا اسرة كثيرة التنقل .. في حياتي أنا لوحدي اتنقلنا بين 6 شقق في دولتين "السعودية ثم مصر"

الدمام حيثُ ولدت أنا واختي يارا

ثم الخُبر هي جنب الدمام و مش فاكره عنها اي حاجه فعلا

ثم الرياض محل ميلاد اخواتي رؤى و علا و مكان حصولي على الشهادة الابتدائية "عشان كده أنا أكبر من دفعتي بسنه عشان ابتدائي السعوديه فيه 6 سنين مش 5"

 ثم مدينة العاشر من رمضان حيث ميلاد ميس الصغنونه آخر العنقود، و هو المكان اللي خدت فيها 2 ثانوي و جبت مجموع 95.6% فبابا و ماما قالوا البنت شكلها هاتجيب هندسه، هيا بنا ننقل محافظة الجيزة عشان تدخل جامعة القاهرة مش الزقازيق حيث أن العاشر تابعه لمحافظة الشرقية ..  "الجميل بقى ان طلبة العاشر من رمضان دفعتي اتفتحلهم في التنسيق يدخلوا جامعة عين شمس! يعني كان ممكن ادخل عين شمس من العاشر عادي، بس خير :) "

 ثم العمرانيه حيث حصلت في سنه تالته لوحدها بالمستوى الرفيع على 100.9% و مجموع السنتين بقى 98.2% مما أهلني لدخول هندسة القاهرة بجدارة و بزيادة  نحو 3% في المجموع  .. "واخدين بالكم اننا اتنقلنا مخصوص عشاني!! :') "

ثم مسكننا الحالي في فيصل  .. ومع ان يارا جاتلها كلية حاسبات و معلومات حلوان ما نقلناش حلوان ولا حاجه P:

و ماما بتخطط لعملية انتقال اخرى مش عارفه هاتنجح ولا لأ .. الله المستعان

أنا من زمان نفسي أكتب عن تجربة الانتقال الكتير دي، و آثارها في نفسي بس برضو مش هاتكلم في الموضوع كاملاً دلوقتي، كفايه عليكم الكام معلومة دول دلوقتي .. انا هاتكلم عن تفصيلة صغيره جداً جداً بس المره دي

و آه ما تقلقوش التدوينة عن مصطفى حسني كملوا بس للآخر D:

أنا مش فاكره حاجه من الدمام و الخبر .. بس فاكره لما كنا في الرياض كنا بنروح لخالو في الخبر .. و فاكرة لما كنا في العاشر كنا بنروح نزور أهلنا في القاهرة أو الجيزة أو نتفسح في أي مدينة من مدن القناة ولما نقلنا الجيزة فضلنا نزور أهلنا في القاهرة و بنروح العاشر نزورها كل فترة .. دايماً في علاقة بتربطنا بمدينة أو مُدن أخرى بعيدة عننا بتضطرنا هذه العلاقة إلى التنقل لساعات طويلة بعض الشئ في العربية مع بابا 

أنا باتعب من المشاوير الطويلة دي، دايما بطني بتوجعني معرفش ليه .. وجع بطني ده كان بيخليني مش قادره اركز في القراءة كل ما بنوي اقرأ في السكه يعني، الحل التاني للتسليه في السكة كانت اني اسمع اغاني ! 

لما جينا مصر .. كان عندي 13 سنة تقريباً كنت في أولى اعدادي كانت الموبايلات لسه بايريال و بتنور اصفر .. كان في واكمان بس باين، ده كان ممل ده أوي .. من الآخر يعني .. الاعتماد الأكبر كان على الراديو، وشرايط الكاسيت .. 

المهم 

أول ما نركب العربيه دايما بابا بيشغل قرآن على طول .. أو شريط أذكار الصباح و المساء بتاع مشاري العفاسي لو ده وقت الأذكار .. كنا نفضل احنا قاعدين مستنيين السورة تخلص أو الاذكار تخلص عشان نقول لبابا بسرعه يا بابا هات 100.6 

مكنش بيرضى دايما .. 

ساعات كمان لما كنا نقوله يجيب 100.6 كان بيجيب اذاعة القرآن الكريم 

هو كان بيفتح الراديو يلاقي اذاعة القرآن الكريم شغاله "لانه كان قافله عليها" فبيسيبها .. 

احنا كنا بنبقى قاعدين متدايقيين أوي! .. يعني احنا عايزيين نسمع اغاني يقوم بابا جايبه قرآن! كنا بنقعد نهمس لبعض بالكلام ده و احنا خايفيين لا يكون كلام حرام .. بس كنا بنقول يعني لو بابا عايزينا نبطل نسمع اغاني اكيد في طريقه احسن من كده! ده كده هايخلينا نبقى متدايقيين كل ما نسمع قرآن! .. الحمد لله مفيش حاجه زي كده حصلت! :)) أنا بحكيلكو اللي كنا بنقوله أنا واخواتي كما هو ليس إلا) .. بالعكس احنا يمكن ماحفظناش اذكار الصباح و المساء الا من تكرار سماعها في العربيه بصوت العفاسي المميز 

ساعات بقى بابا كان بيشغل محطه بتجيب اغاني قديمة، مش فاكرة رقمها كام، بتجيب اغاني شاديه ومعرفش مين الصغيرة و الجيل ده يعني .. 

كنا بنطلع كل اللي احنا كاتمينه -خوفاً من انه يكون حرام- في الاغاني دي بقى! يلاااهوي على الزن و الرخامه اللي كنا بنبقى فيها! و نقعد نتريق على الاغاني و الكلام و كله! لحد ما بابا يا عيني يزهق و يجيبلنا 100.6 لحد ما يصدع من الدّب اللي فيها و نقفل الراديو و نغرق في صمت دامس =) 

مره كنا مسافرين مصيف بقى، المسافه سمحت لنا بتجربة كل ذلك + سمعنا شريط أم كلثوم بابا كان جايبه، كنا دايماً أي مشوار أيا كان طوله ياااا دووووب كان بيكفي الموسيقى اللي في الأول و اول كوبليه بس D: بس في المشوار ده كانت المرة الأولى -والأخيرة- اللي نسمع فيها الاغنيه دي كامله على بعضها كده :)) .. تخيلوا .. الاغنيه عجبتنا .. كلنا .. عشان ادينا نفسنا فرصة نسمعها، او عشان كنا خلاص جربنا كل حاجه و مش حاسين اننا عايزيين 100.6 أوي يعني فقولنا نجرّب و سمعنا .. وعجبتنا!

على فكرة، والله العظيم التدوينه عن مصطفى حسني، صبراً D:

يجب التنويه أولاً ان الكلام ده كان من فترة يعني كنت اصغر من كده .. مش فاكره بالظبط كام سنه بس غالباً في الفترة بين 13 - 19 سنة .. الرقمين دول بيحددوا الفترة بين نزولنا مصر تقريباً  لحد ما ربنا تاب عليا من سماع الاغاني، أو على الاقل طلب سماعها

عقبال يارب ما ابطل اسمع موسيقى، ادعولي بالله عليكم حتى لو مش مقتنعين 

تعرفوا بقى ابليكيشن  "تويت قرآن" و "داعية.كوم" و و .. 

اللي بيعمل post لآيات قرآنية و أحاديث اتوماتيكيا على أكاونت فيسبوك أو تويتر ده :) 

عارفين انه في ناس معترضه على الابليكيشنز دي؟ 

بيقولوا ان اللي بيشترك فيها عايز ثواب على الجاهز من غير ما يتعب فيه، أو بيقوله انه spamming أو انه ملوش لازمه طالما مش انا اللي كاتباه و اني ممكن حتى ما ابصش على اللي بيتعملو post اتوماتيكيا ده من عندي! .. في من الناس دي من يؤمن أصلا بانه أي دعاء او آيه او حديث او او حضرتك ممكن تقوله بينه و بين نفسك .. افتكره و ادعي ربنا .. افتركه و قوم صلي .. بس مش النفروض تقولنا .. من باب دفع الرياء مثلاً .. أو من باب لا تزايد علينا يا فلان لست أكثر منا ايمانا او اي حاجه 

بدون دخول في تفاصيل أكتر من كده، الكلام اللي فوق ده أنا مش متفقه معاه + أنا مشتركه في تطبيقات بتتويت و بت post آيات و أحاديث و سنن الرسول صلى الله عليه و سلم على فيسبوك و تويتر و مش ناويه احذفهم فعلاً .. 

لما مرة حاولت اتناقش مع احدهم في اسباب اقتناعي بالتطبيقات دي قاللي يا مرام أنا ما بتكلمش عليكي يعني أنا باتكلم على الناس اللي حطاه تأديه واجب و خلاص دول! .. من يومها قررت مش هتناقش مع حد في الموضوع ده تاني .. 

اظن بدأتو تخمنو أنا هاكلمكو في ايه ^_^

الجديد ايه بقى؟

ابليكيشن مصطفى حسني .. اللي هو اسمه ‎AlaTareqAllah | على طريق الله .. مش ناويه اشترك فيه ده .. مش عشان حاجه أكتر من اني حتى تطبيقات الأدعية ما اشتركتش فيها لاني كذا مره الاقيها بتكتب أدعية أو اذكار أو أقوال أو أو غريبه! ادور عليها الاقيها مش صح! أو احاديث مش صح او او .. فخليتني في المضمون أحسن :) 

لا يخفى على احدكم -الكلام هنا لاصحابي أو قارئي تدوينتي القديمة نسبياً  اللي اسمها 3 رمضان- اني بأُكن كامل الاحترام و التقدير و الشكر و العرفان و كل حاجه حلوه تيجي على بالكو لاستاذ مصطفى حسني .. أنا لو عندي دم المفروض اقعد كده ادعيلو ليل نهار!

اللي يخفى عليكم بقى، اني حاسه اني مقصرة في حق استاذي، لاني ما بردش عنه غيبته في كل بوست وكل تويته في ناس بتجاهم فيها الابليكيشن ده ..
آه .. في ناس بتهاجم التطبيق ده  .. بتجاهمه بشراسه، لدرجة انه بدؤوا يهاجموا في مصطفى حسني نفسه .. 

بصوا هي حاجه من 2 .. ملهومش تالت بجد!

يا فكرة الابليكيشن دي أصلاً مش عاجباكو و بتخنقكوا و بالتالي أكيد "داعية.كوم" و "تويت قرآن" خانقينكوا برضو .. بس اللي حصل انكو قعدتو ساكتين خوفاً من ان "اللي انتو هاتقولوه ده يكون حرام" .. و حتى لما بعضكو اتكلم ما قلتوش السبب الحقيقي و اتكلمتوا عن شويه اسباب فرعيه شكلها حلو .. 

يا اما انتو متدايقيين من مصطفى حسني نفسه .. و ده يتضمن نقطتين

- يا انتو ما سمعتهوش أصلاً بس ما بتحبهوش لاي سبب كان، نصيحتي اسمعوه الأول، مش عشان هو كويس ولا أي حاجه أنا نفسي مبقتش باتفرج على برامجه الا قليل، بس على الاقل عشان تبقوا صادقين مع انفسكم في الحكم عليه، والله أعلم مش ممكن كلامه يعجبكم

- يا اما انتو اديتولو فرصه و سمعتوه و معجبكوش فعلاً .. و في الحاله دي برضو الهجوم المبالغ فيه ده مش مبرر بجد! واحد سمعته معاجبكش خلاص خلصنا! .. يعني انت عايز تفهمني انه مفيش ولا حد في ال friends عندك انت مش طايقه؟ ولا طايق ال posts بتاعته بس مش عارف تشيله عشان هايزعل و يقرفك؟ .. اعتبره friend يا ااااخي! ولا انت اصلا متعصب من الابليكيشنز دي كلها و مش عارف تتكلم و أما صدقت جه الابليكيشن ده عشان تطلع فيه عصبيتك؟
مع الفارق طبعاً .. حضرتك مش شايف انك كده بتطلع مدايقتك من اذاعة القرآن الكريم في اغاني شاديه و .. "معرفش مين الصغيرة دي" ؟؟ ..

مش متوقعه ان حد هايوصل للسطر ده .. بس عموماً يعني، اوعى تجيب في سيرة مصطفى حسني بحاجه وحشه!!! انا نويت اخرج عن صمتي و هابهدل الدنيا! اياك اسمع كلمة عنه! D:

صلّ على النبي و ادعيله بقى! بعد اذنك حضرتك يعني  :$ =))