3
رمضان
1430
فاتحه فيسبوك كالعاده
باصصه على الشاشه و بافكر
في اللي لسه قايلاهولي
.. كانت .. بنت اتعرفت عليها على الانترنت
خريجة تربية جامعة اسكندريه
مكنتش عادتي اني اكلم ناس ماعرفهمش على الانترنت
بس البنت دي كانت حالة خاصة
كان ليها دور معين لازم تعمله و بعدها اختفت
ماشفتهاش و لا كلمتها بعدها كتير
و دلوقتي حتى -للاسف- مش فاكره اسمها
.. ركزت كويس اوي في كلامها
افتكرت : من ترك شيئا لله عوضه الله خيرا منه
فكرت في الاحكام الغير عادله للبشر
يا ترى هيقولوا ايه ؟
أنا قد الخطوه دي؟
الخطوه دي مهمه اصلا ؟
مينفعش اعملها بطريقه تانيه ؟؟
افتكرت يوم "الندوه" بكل تفاصيله و كأنه كان امبارح
.. هو مش بعيد
من 10 ايام او اكتر شويه
مكنش يوم مميز باي حال من الاحوال
! ماحستش ببداية مختلفه .. اكثر اشراقا من باقي الايام مثلا
نفس الطريق كثيـــــــــــر المواصلات
نفس امضاء " تسجيل الحضور" في نفس الوقت
نفس التحيات الصباحية المعتاده
نفس النظرات المتفحصه او المشفقه او المستغربه لتلك المُتدربة صغيرة السن و الخبره التي هي ... أنا
كالعاده كان أسوء ما في اليوم التدريبي هو تلك الاغنيات التي كانوا يصرون على اقحامها كخلفية ليوم العمل
كنت باجتهد اني اوصل السماعات لاعمـــق مكان جوه ودني .. مانعة بذلك وصول الاغنيات اليها .. و مستبدلة ايها باصوات احب الى قلبي ..
من اذاعة القرآن الكريم
كنت أضعف
و كنت بخاف انتكس
مكنتش عايزه ارجع اسمع اغاني تاني
اجتهدت ايضا لازاحة اي القاب ينسبونها الي نتيجة فعلتي "المريبه" تلك بعد ان فشلت
محاولاتي في اقناعهم بانني فقط .. مابحبش اسمع اغاني
لكن هيهات
ميعرفوش اني ضعيفه مش عارفه اتحكم في نفسي
زي المدمن اللي لسه في اولى مراحل العلاج
كانوا -زي كتير من اقاربي و اهلي و اصحابي- مصريين يثقلوا ظهري بمسميات و القاب
كنت و مازلت ابعد ما يكون عنها
ما علينا
! كان نفسي اليوم ده يخلص بسرعه عشان اروح الساقيه
كان اول يوم في حياتي هاروح الساقيه
كنت باسمع عنها كتير .. بس ما شفتهاش
سمعت قبلها بعدة ايام انه في ندوة لداعية شاب اسمه مصطفى حسني .. هايعملها في اليوم ده في الساقيه
مصطفى حسني؟ ممم ماعرفهوش برضو
شفتله كام فيديو متجمع بس قبل كده عن الصحوبيه
كان معاه اتنين تانيين .. اسمهم معز مسعود و عمرو خالد
معرفش عنهم اكتر من كده .. بس كلامهم عجبني
اقنعت ماما اني هاقضي الساعات الفرق بين انتهاء اليوم التدريبي و بداية الندوة باني هاقعد اتفرج على الساقيه شويه .. وافقت
بعد ما خلصت التدريب اخيرا
كلمت صاحبتي .. اعتذرت
قالتلي معلش مش هاقدر احضر الندوة .. المره الجايه بقى
اتدايقت اوي! .. هافضل قاعده ده كله لوحدي؟
روحت الساقيه برضو
قعدت الف شويه على ما عرفت الباب منين
دخلت استغربت شكل الساقيه و بساطتتها المبالغ فيها! عجبتني اللافتات المميزه جوه
حسيت المكان ده اكثر رحمة بامثالي " المتحولين " اللي محتاجين يتحولوا في صمت و في اوساط اكثر هدوءا من صخب العالم المفتري بره
الحريه لما بتسكن مكان بتبان على كل ملامحه
بتحس بالهواء بيشجعك و بيقويك
بتحس الناس اللي حواليك فاهمينك حتى لو مش باصينلك
حسيت كده هناك اوي
حبيت المكان
اتأخر يومها مصطفى حسني لمدة ساعه تقريبا عن الندوه
ما حسيتش بيهم .. و ما اتضايقتش
كل لحظه بتعدي كنت باستغرب كمية الناس اللي جايه تسمع الداعية المغمور - من وجهة نظري حينها- كل دي ناس؟ مصرين يحضروا كده ليه؟
امتى هايبطلوا يجيوا ؟
المكان اتزحم و الناس بدأت تقعد على الارض
الارض اتزحمت و الناس بدأت تفرح انها لقت مكان تقف فيه
أنا كنت قاعده على تربيزه مع 2 تانيين
بدأ كلامه بشكر الحضور .. اعتذار عن التأخير.. و بيان لاجر تعبنا و جهدنا من أجل جلسة علم و ما الى ذلك .. على ما اتذكر
افتتح الندوة قائلا بعد مقدمة لا بأس بها :
النهارده هانتكلم عن برنامج رمضان السنه دي .. برنامج : قصة حب
الأول دماغي ما استوعبتش ان هو ده اسم البرنامج فعلا
لما كرر الاسم تاني ما عجبنيش!؟
قلت في نفسي : قصة حب ايه ؟ ده برنامج ديني و في رمضان ! حب ايه و بتاع ايه ؟
اكيد هايقعد يتكلم عن الصحوبيه برضو !! هو معندوش موضوع غيره ؟
حتى ولو يعني! هايقعد 30 حلقة يحكي في الصحوبيه!!
بدأت اتدايق
لقيته بيكمل:.. و ليه كل ما بتيجي سيرة كلمة الحب بيجي على بالنا العلاقة بين الشباب و البنات ..
العلاقة الغلط بالذات ؟
.. مع انه في حب حلال حبـ
أنا تنحت
و أمرت نفسي بان تنصت لكل حرف هايقوله دون نقاش
الراجل شكله فاهم
و أنا شكلي في معاني كتيــــر اوي تايهه مني
الجمله دي يمكن أنا و انتو سمعناها كتير قبل كده و لسه بنسمعها و هانسمعها.. بس في اللحظة دي ربنا اراد اني افهمها
!معرفش ليه اكتر جزء اثر فيا في الندوة .. جزء حب الانسان للجماد
مع انه اتكلم عن علاقات انسانيه راقيه كتير! بس الجماد هو اللي استفز دموعي
!يمكن عشان الجماد كان اكتر حاجه انا مش حاسسه ان ليها قيمه كده
كنت لما باتعصب -و ده بيحصل كتير- اقعد اضرب مخدتي .. او اكتب اللي معصبني فيورقه و اقعد اقطع فيها بغل
حسيت اني كنت غير رحيمه معاهم
الندوه و هي شغاله كان في حاجات جميله اوي بتحصل بقى
الناس اللي قاعده بتقف للي واقفين
و الناس بتتبادل زجاجات المياه عشان تخفف عن بعض في الحر ده
ابتسامات مليانه حب و مليانه اعتذارات عن اخطاء لم يقترفوها بحقنا نحن .. بل هي
اعتذارات أبت أن تظل قيد الكتمان لفترة اطول .. بعدما ملأت كلمات الداعية الغير مغمور وجداننا يقيناً باننا شُغلنا بتوافهه الامور عن أهمها
و انه قد آن أوان الافصاح عن الحب
خرجت من الندوة المغرب .. و الدنيا ليل
واقفه على باب الساقيه الدنيا زحمه بطريقه مش منطقيه
- الناس بره في الساقيه بيسألونا هو فيه ايه ؟
-ندوة مصطفى حسني ..
- ااااه
معرفتش المفروض اركب ايه و انا مروحه .. الحل الوحيد اني امشي لدار الاوبرا
و اركب من هناك اي حاجه
بعد ما فشلت في اني الاقي تاكسي يوديني هناك
بكيت كما لم ابكي من قبل
بعد ما بعدت شويه عن الساقيه
الدنيا كانت ضلمه .. و تقريبا كنت ماشيه في الشارع لوحدي
كل ما كنت باشوف شجره كنت باعيط اكتر
قطه ماشيه اعيط تاني
سور الاوبرا
الرصيف
الشارع
اي بني آدم معدي من بعيد
حسيت اني كنت ظالمه نفسي و ظالمه مئات الآلاف من الكائنات لما كنت مش مركزه اننا ممكن فعلا نحب بعض
احم .. في ناس عدت جنبي ساعتها
اعتقد انهم شافوني
:) مكنتش عارفه اعمل ايه
قلت ابتسم عشان ماحدش يفتكرني متدايقه و ادايقه
! فقلت لايخافوا و يقولوا عليا مجنونه و يجروا مني
بقيت باخبي وشي قد ما اقدر بطريقة لا تثير الريبه
.. كانت حاله كده
عشت بيها فتره طويله
بعدها بقت جملة " ندوة في ساقية الصاوي لمصطفى حسني قبل رمضان " تعني لي
الكثيــــــــــــر و الكثير
اليوم ده على الرغم من اني مش فاكره تاريخه حتى
! ماعتقدش اني ينفع انساه
يوم تاريخي فاصل
نرجع لصاحبتي الاسكندرانيه
خريجة تربيه .. نسيتوا و لا ايه ؟
:))
يوم 3 رمضان
بتسألني عامله ايه في رمضان
قلتلها تمام
بس في كام حاجه كده شاغله بالي
ادعيلي
قالت : خير مالك؟
.. فكرت: اقولها و لا فاكس؟ .. قولي .. ممكن تفيدك في الموضوع الله اعلم
قلتلها متدايقه بس شويه عشان الولاد اللي باكلمهم على الانترنت
قالتلي ولاد؟؟؟؟؟ انتي عندك فريندز ولاد؟
قلتلها ااااه
قالتلي طب ماتمسحيهم؟
قلتلها مش عارفه
قالتلي طب فكري كده انتي ايه اللي مدايقك اصلا في كلامك معاهم؟
و هل في حاجه تستاهل ؟
انتي باقيه عليهم اوي يعني؟
قلتلها طب ثواني كده
قعدت افكر
دول اصحابي! بقالهم سنتين تقريبا
اكيد هاتبقى حركة قليلة الذوق جدا اني امسحهم
بعدين المشكله مش في اني امسحهم بس يعني !؟ ما في كليه كمان كام شهر .. هاعمل
ايه ؟
ما هو لازم يبقى قرار و يتاخد
طب انا كده هايبقى اصحابي مين؟
!ماعرفش بنات مابتكلمش ولاد خالص
معرفش في بنات كده في دفعتي اصلا و لا لأ ؟
افتكرت اسألتها :
انتي باقيه عليهم؟
اه اكيد باقيه عليهم .. مش عايزياهم يتدايقوا
طب انا ايه اللي مدايقني في كلامي معاهم اصلا ؟
احنا هانهرج! ما انتي عارفه انتي بتهزري بزياده! و بترغي بزياده!
و عارفه ان الخطوه دي هاتيجي هاتيجي! انتي عارفه و بتفكري في ده من فتره
طب استنى شويه لحد ما آخد على اللبس الجديد ده ؟ و على الحياه من غير اغاني و من غير.. و من غير... و بعدين ابقى اخد خطوه جديده؟
طب اطلع اسأل ماما .. اخد رأيها ؟
لآ ركزي كده .. ده قرارك انتي
طب هما هايحترموا قراري ولا هايدايقوا مني؟
سيبت اللابتوب شويه
من ترك شيئا لله عوضة الله خيرا منه
لا طاعة لمخلوق في معصية الخالق
فتحت الفريندز ليست
و مسحت كل الولاد
كلـــــهم!
كنت بادوس على زرار
remove friend
و اقول -في سري- جملة اعتذار للشخص اللي باحذفه
و أاكد الحذف باني ادوس
remove
تاني .. و اقول -في سري تاني - جملة تأكيد ان رضا ربنا أهم و أعلى من رضا البشر
مش فاكره الجملتين بالظبط .. بس فاكره اني كنت بازداد اقتناعا بيها بعد حذف كل اسم
في ناس قلقت شويه و انا باعتذرلهم .. بس رضا ربنا كان اقوى
اتأكدت تاني ان الليست خاليه تماما من اي ولاد .. و طلعت بسعادة مبالغ فيها بازف الخبر لماما
استغربت القرار المفاجئ جدا! و كان عندها فضول قاتل تعرف السبب
بس أنا كنت عايزه افرح صاحبتي الاسكندرانيه
قلتلها خلاص
قالت خلاص ايه؟
قلتلها مسحتهم
هما مين دول؟
الولاد اللي عندي
قعدت تضحك
قالتلي انتي لحقتي ؟
خدت بالي ساعتها انه مافاتش وقت كتير من ساعة ما سيبتها اخر مره فعلا .. اقل من
ساعه .. ساعه و كسور .. او ساعتين .. او تلاته .. مش فاكره بالظبط
بس كانت فترة زمينه حصل فيها احداث تكفي لاعلان هذا اليوم يوم مولدي الثاني
وباحتفل بيه من يوميها على الضيق كده بيني و بين اصحابي المقربين
3 رمضان
:) و النهارده تميت 3 سنين
اليوم ده اهميته بالنسبه لي مش في انه يوم مسحت فيه فريندز من على فيسبوك!
ابسلوتلي
اليوم ده قدرت فيه - بارادة ربنا و عونه و توفيقه - اني اخد قرار
و اني اغلّب رضا ربنا على هوى نفسي
و اني اعيد ترتيب اولويات حياتي
و اني ادرك تماما قدر القيود المجتمعيه و كلام الناس و .. و .. و ما الى ذلك
اليوم ده كان اول تطبيق عملي لندوة قصة حب
:)
بعد ما بقيت مدركه لحقائق كتيــــر اوي مكنتش بتيجي على بالي حتى
فخوره باليوم ده جدا
ممتنه للبنت دي جدا
و فوق كل ده معترفه بفضل ربنا سبحانه و تعالي
اللي قواني يومها
مع اني بعد فتره اكتشفت ان الموضوع كان ممكن يتحل بصور افضل من كده
بس في اليوم ده في الساعه دي و أنا بالحاله دي
ما اعتقدش كان ينفع يتحل حل تاني
الحمد لله .. الحمد لله .. الحمد لله
مريت بعدها خلال الـ 3 سنوات .. بمراحل كتيـــــر جدا
الأول لقيت بنات ما بيكلموش ولاد في دفعتي .. بنات كتير كمان
مكنتش شايفاهم
ساعدوني كتير جداااااا في تخطي كثير مما هو سئ و اعانتي على كثير مما هو صالح
مريت بلحظات تفريط و ألم و قرب جميل و رجاء و تشدد و ضعف و قوه زائفه و قرب تاني و حنين و رجاء و اغترار و شك و راحه و فهم و استقرار و ضعف تاني و قرب تاني و و و و و
دلوقتي انا في مرحلة محاولة الاتزان
بعد 3 سنين؟؟
مش عارفه تتوازني ده كله؟
اه مش عارفه اتوازن ده كله
صاحبتي "من اللي ما بيكلموش ولاد" قالتلي فيم معناه : انتي بشخصيتك دي و طباعك دي و و و لولا انك عيشتي ده كله .. كان هايبقى التوازن بالنسبه لك مجرد كلام نظري
مجرد حاجه بتتقال مش حاسساها و لا حاسسه المفروض تتعمل ازاي
لعله خير
اسمها عزة سامي باي زا واي =)
.. و هي اللي علمتني "مبدأ" لعله خيـــــر
لعله خير دي اسلوب حياه
كل ما مريت بيه في الـ 3 سنين دول فهمني .. اني لسه محتاجه افهم اكتر
و هافضل محتاجه افهم ما حييت و يوم لما افتكر نفسي فهمت هابقى في أمس الحاجه للفهم
ختاما
الحمد لله
^^و كل سنة و انا طيبه
