امتحان نحو

مش متكيفه تماما مع فكرة انه مفيش ولا ثابت واحد في حياتي ! مفيش ولا حاجه المفروض ابقى بعملها أو حاجه موجودة و أنا باكمل عليها .. 

يعني قبل كده كان في مدرسة و دروس و مذاكرة .. و اصحابي غالبا بيبقوا من اللي معايا في الفصل .. او بالكتير اوي المدرسة .. 

الانشطة المتاحه .. الاذاعة .. النادي ان وجد .. تيليفيزيون ... ممممممم تقريبا بس 

عدد الساعات "بتاااااعتي" اللي فاضله في اليوم كانت بتبقى قليله اوي .. و على قدي .. كنت باعرف اقضيها و اعمل اللي بحبه فيها

فجأه كده في يوم من الأيام صحيت الصبح عشان " المفروض" اروح اناقش مشروع التخرج .. 

رحت .. 

ناقشت ..

رجعت .. 

لقيت الـ 24 ساعه خلاص كلللهم بقوا بتوعي! كلهم انا اللي هاقسمهم كللللللللللهم 

طب انا عايزه و عايزه و عايزه ... 

ماشي .. اعملي اللي انتي عايزاه .. مستنيه ايه!؟

اه لوحدك 

مينفعش أقول مش هاعرف! 

هتاكل .. و وقتي هايعدي 

وقتي هايعدي دي اللي التفكير فيها بيجنني!!

فات من عمري 23 سنة!! و معرفش فاضل قد ايه .. ! 

الاختبار برضو صعب اوي .. اصعب حاجه ان معاده مش معروف !!!

انا فاكره في خامسة او سادسه ابتدائي رحت يوم امتحان آخر السنة مذاكرة تاريخ, و طلع كان عندي نحو مش تاريخ .. بس قفلت النحو عادي جبت الدرجة النهائية يعني, و كسبت وقت مذاكرة اكتر للتاريخ اللي كان صعب ساعتها اوي و قفلته هو كمان .. 

مستحيل اقدر أكسب فرصة تانية في امتحان دنيتي زي فرصة التاريخ .. مفيش حاجة اسمها وقت اضافي ..! 

بس ممكن تبقى زي امتحان النحو 

يارب اجعل امتحان دنيتي زي امتحان النحو ده يارب .. 

مش فاكرة انا كنت باعمل ايه طول السنة عشان اقدر اوصل للنتيجة دي!

يارب أفتكر 

يارب قدرني على اللي فيه الخير و الصلاح 

عامة, أنا منهكة من التفكير في المستقبل .. مش حاملة همه لانه اكيد اللي هايحصل أيا كان هو خير .. 

بس المتغيرات كتيره بطريقه بشعه 

و مفيش حاجه اسمها البداية الصح 

او الترتيب الأصح 

طريقي ماشي بالمسكنات .. 

انبساطات لحظية متعدده تديني زقه خفيفه حنينه لقدام و تطمني او توهمني اني ماشيه على الطريق الصح 

حاسسه الجد قرب أوي, متحفزة بشدة للي هايحصل, معرفش ليه و امتى اقتنعت ان اللي جاي اشبه بمعركة تحديد مصير .. 

ما انكرش اني خايفة ..

خايفة كمان أتاخد اوي, أو اتشتت عن سبب المعركة الاساسي  .. خايفة الدنيا تاخدني

مش عارفه انتو فاهمين قصدي ولا لأ .. 

ما اتناقشتش لحد دلوقتي مع حد في جزء من افكاري حول المستقبل المبهم ده الا و كانت نبرة صوته بتلمح لجزء من المخاوف دي أو كلها أو أكثر منها .. 

ربما ..؟

..

..

.

اللهم إني أسالك علماً نافعاً و رزقاً طيباً و عملاً متقبلاً ..

يـــارب استخدمنا ولا تستبدلنا .. آميــــن