عن الكلمات,

في مرة من المرارير .. 
واحده صاحبتي بحبها جدا <3 كانت بتكلمني على فيسبوك
كانت بتحكيلي مشكلة ما و كانت متدايقه جدا
و أنا كنت هاتجنن! مش عارفه اصبرها بايه ولا اقولها حل ! الحكاية كانت مكركبة جدا و مكنتش شايفالها حل خالص, بس مينفعش اقولها كده ابدا .. خااااااااااصة انها كانت متدايقه جدا!
تقريبا ماقولتش حاجه .. كنت خايفه تقول اني مش فارق معايا الموضوع او ايا كان, بس والله ما كان في كلام يتقال كنت متدايقه من دماغي جدا انها مش عارفه تفكر!!!!

لقيتها بعد ما خلَّصِت (( و انا ماقولتش حاجه!))  بتقوللي كلام فيما معناه يعني بتشكرني و بتقوللي انتي قلتي كلمة كذا في وسط كلامك .. الكلمة دي فرقت معايا أوي و حسيت اني كان المفروض افكر بالطريقة الفلانية ... الخ 

أنا نفسي مكنتش بقول الكلمة دي على انها حل .. 
و رجعت بصيت في كلامي تاني عشان اشوف كتبتها فين دي ! 
كانت كلمة عاديه جدا بالنسبه لي .. بقولها كتير في مواقف كتيــــــر بس بالنسبه لها هي في الموقف ده مكانتش عاديه ابدا! 

الحوار ده ممكن يكون عادي بالنسبه لك وممكن حد يكون بيشتمني دلوقتي على وقته اللي ضيعتهوله =)) بس الموقف بالنسبه لي كان مهم جــــــــــــــــــــــــــــــدا .. صحصح معاني كتير جدا كانت مشتته في دماغي .. و طبعا هي متعرفش ازاي رد فعلها ده كان و مازال مؤثر فيا بالايجاب بطريقه مبالغ فيها =) 

أولا هي بنت حلال مصفي, انها لقطت رسالة فيها حل يريحها من وسط كلام مكنش ليه اي معنى .. أنا مؤمنة جدا بان الرسائل اللي حوالين كل واحد فينا لا تعد ولا تحصى!
محتاجين (ثقه بالله) و (يقين قوي بان أمرنا كله خير) و (اقتناع تام باننا لازم نسعى لاننا نبقى أحسن) و (ان محدش هايحللنا مشاكلنا الا احنا)  عشان نعرف نلقط الرسائل دي و نصدقها.

ثانيا النيــــه .. لما قعدت عماله بقرأ الكلام و دماغي لفّت من التفكير و قاعده بادعي يارب والله نفسي اساعدها بكلمة أو اخفف عنها حاجه بسيطه حتى يارب .. ربنا بعتلها في كلامي كلمة ريّحتها ولو جزئيا, من غير حتى ما انا أحس ..
ظبط النيه .. خد بالاسباب .. توكل على الله .. وبس! 
في كل حاجه بتعملها في الدنيا بقى.

ثالثا تأثير الكلمات .. هاتكلم في العكس بقى, التأثير السلبي للكلمات .. 
كاااام مرة في حياتك اتقالتلك كلمة عكننتك لفترة محترمه! و مكنتش عارف حتى اللي قالها كان قاصد ولا لأ؟ 
طب كام مرة انت قلت لحد كلمة و بعد ما مشيت قلت لنفسك ايه السخافة اللي أنا فيها دي!؟ 
طيب متوقع كام مرة انت زعلت حد منك بكلمة و متعرفش لحد دلوقتي!؟
مهما عملت ممكن تفلت منك كلمة كده و لا كده, بس تقدر تركز أكتر و تقلل من التأثير السلبي لكلماتك ..

أنا فاكرة الشيخ أحمد الطيب أول ما بقى شيخ الأزهر كان في مذيعة ما عاملة معاه حوار تليلفيزيوني و سألته عن عيد الأم, و هل هو حرام ولا لأ .. بغض النظر عن رأيك أو رأيه في الموضوع هو قال جملة احترمتها جدا معناها .. الألم اللي اليوم ده بيسببه ليتيم أو طفل فقد أمه لا يقارن بفرحة المحتفل به .. 

الكلام ده حسيته أوي ساعة النتيجة بتاعنا السنه دي .. لا يخفى على كثير منكم اني كنت عايشة حالة انطواء و انغلاق على النفس مع القليل من الاكتئاب! انا الى الآن ماردتش على ولا مبروك جاتلي على النتيجه خالص الا بعدها بفتره طويله " شهر تقريبا على ما اتذكر" و كمان هما حالتين تلاته بس و كان ليهم اسبابهم!
الحاله اللي انا كنت عايشاها كانت غلط جدا, و كنت عارفة ده, بس مكنش قادره ما ازعلش, اعتقد اني كنت راضيه, يارب أكون فعلا ساعتها ما وقعتش في وحل السخط والعياذ بالله .. بس اللي حصل انه في وقت ما كلمة "مبروك" كانت بتؤلمني بشده!! مكنتش عايزه اسمعها لا بتتقال ليا و لا لغيري 

أكيد ما اقصدش ان الناس ما تفرحش, اكيد لأ .. ربنا يسعد كل الناس ياااااارب .. بس حاسه اللي انا بتكلم فيه ده درجة حلوه حالمه كده من الرحمة و مراعاة مشاعر الناس 
كل واحد يقدر يفرح من غير ما يدايق حد من اللي حواليه خالص! 

زي .. موضوع الأكل في الشارع مثلا .. عزة قبل كده قالتلي انها مابتحبش تاكل في الشارع تحسباً ان أي طفل يشوفها و يكون جعان! ده أقل حاجه يعني ..

في حاجات كتير الواحد بيعملها وهي حقه تماما و محدش يقدر يقولو نص كلمة .. بس لو معملهاش هايخفف عن ناس كتير 

أنا نفسي ابقى كده,